မိူဝ်ႈၵွၼ်ႇဢွၼ်ၼၼ်ႉ
တီႈၼႂ်းထိူၼ်ႇလူင်လုၵ်ႈၼိုင်ႈ
မီးတူဝ်သတ်းတင်းၼမ်တင်းလၢႆ
ၼႂ်းတူဝ်သတ်းတင်းၼမ်ၼၼ်ႉ
မီးၵဝ်ႉထဝ်ႈလူင်တူဝ်ၼိုင်ႈ
ၵဝ်ႉတူဝ်ၼႆႉ ပၺ်ႇၺႃႇတၢင်းႁူႉ
တၢင်းမေႃမၼ်း
ၵတ်ႉၶႅၼ်ႇလႅၼ်ၽၢႆၼႃႇ။
ယွၼ်ႉၼၼ်လႄႈ
တူဝ်သတ်းၶဝ်လႆႈပိုင်ႈဢိင်ႈမၼ်းတႄႉꧦ
မီးပၼ်ႁႃသင်မႃးၵေႃႈ
မႃးႁႃမၼ်း မႃးၸူးမၼ်း
ၵႄႈလိတ်ႈပၼ်ယဝ်ႉ။
မီးၼင်ႇဝၼ်းၼိုင်ႈ
ၸၢင်ႉတူဝ်ၼိုင်ႈလႄႈ
လိင်းတူဝ်ၼိုင်ႈ
လႆႈပဵၼ်သူပ်းပဵၼ်ၵႂၢမ်းၵၼ်။
ထဵင်ၵၼ်ယွၼ်ႉမႃႇၼၽႂ်မၼ်း
ၸၢင်ႉၵေႃႈဝႃႈမၼ်းႁႅင်း
ၽၢႆႇတၢင်းႁႅင်းၼႆႉ မၼ်းႁႅင်းလိူဝ်ပိူၼ်ႈ၊
လိင်းၵေႃႈဢမ်ႇယွမ်း
ၽၢႆႇၶိုၼ်ႈတူၼ်ႈမႆႉတူၼ်ႈမၢၵ်ႇၼႆႉ
မၼ်းၵေႃႈဝႃႈ မၼ်းၶႅၼ်ႇလိူဝ်ပိူၼ်ႈ
ၵူၺ်းၵႃႈ သွင်ၶႃၼႆႉ
ဢမ်ႇယွၼ်ႇယွမ်းမႃႇၼၶႃတေႃႇၵၼ်လႃးꧦ။
ၵမ်းလိုၼ်းမႃး
သွင်ၶႃၸင်ႇၵႂႃႇၸူးတီႈၵဝ်ႉ
ႁႂ်ႈၵဝ်ႉတႅပ်းတတ်းပၼ်တြႃး
သွင်ၶႃၼႆယဝ်ႉ။
ၵမ်းၼၼ်ႉ
ၵဝ်ႉတူဝ်ၼၼ်ႉၵေႃႈ
ၸင်ႇထၢမ်လွင်ႈထၢမ်တၢင်းမၼ်းသေ
ၽိူဝ်ႇလႆႈႁူႉလွင်ႈတၢင်းမၼ်းလီꧦယဝ်ႉ။
မၼ်းၸင်ႇၸႂ်ႉႁႂ်ႈၶႃသွင်တူဝ်
ၵႂႃႇပိတ်းဢဝ်မၢၵ်ႇမူင်ႈ
ၽၢႆႇပုၼ်ႉၼမ်ႉၼၼ်ႉ
မႃးပၼ်မၼ်းၼႆယဝ်ႉ။
ၵမ်းၼၼ်ႉ
ၸၢင်ႉၸင်ႇဝႃႈႁင်းမၼ်း
“ႁႃးၸႂ်ႉၸဝ်ႈၵႄႈပၼ်
ပၼ်ႁႃႁႃးၼႆႉလူင်
ၸွင်ႇသမ်ႉၵဵဝ်ႇသင်ၵၼ်
တင်းတေလႆႈၵႂႃႇဢဝ်
မၢၵ်ႇမူင်ႈၼၼ်ႉလႃႇ”ၼႆလႄႈ
ၵဝ်ႉၸင်ႇၶိုၼ်းဝႃႈ
“ၵဵဝ်ႇဢိူဝ်ႈ ယွၼ်ႉမၼ်းၵဵဝ်ႇလႄႈ
ၵဝ်ၸင်ႇၸႂ်ႉသွင်ၶိူဝ်ၵႂႃႇဢဝ်မႃးယဝ်ႉ”ၼႆႁင်းသွင်ၶႃယဝ်ႉ။
ၶႃသွင်တူဝ်ၵေႃႈ
ၵႃႈလႆႈၵႂႃႇဢဝ်မၢၵ်ႇမူင်ႈၼၼ်ႉ
တႃႇတေၵႂႃႇဢဝ်မၢၵ်ႇမူင်ႈၼၼ်ႉသမ်ႉ
တေလႆႈၶၢမ်ႈမႄႈၼမ်ႉလူင်
ဢၼ်ၼိုင်ႈယဝ်ႉ။
တႃႇတေၶၢမ်ႈမႄႈၼမ်ႉၼၼ်ႉ
တွၼ်ႈတႃႇၸၢင်ႉတႄႉ
ယွၼ်ႉတူဝ်ယႂ်ႇလႄႈ
ဢမ်ႇမီးလွင်ႈယၢပ်ႇၽိုတ်ႇသင်
တႃႇမၼ်းဝႃႈၼႆသေတႃႉ၊
တွၼ်ႈလႃႇလိင်းတႄႉ
သမ်ႉပဵၼ်လွင်ႈယၢပ်ႇၽိုတ်ႇဝႆႉတႄႉꧦ။
ယွၼ်ႉၼၼ်လႄႈ ၸၢင်ႉၼၼ်ႉ
ၸင်ႇႁႂ်ႈလိင်းၶီႇၼိူဝ်လင်မၼ်းသေ
ၶၢမ်ႈၼမ်ႉၵႂႃႇယဝ်ႉ။
ၽိူဝ်ႇၵႂႃႇႁွတ်ႈထိုင်
တီႈတူၼ်ႈမၢၵ်ႇမူင်ႈၼၼ်ႉ
ယွၼ်ႉပိူဝ်ႈတူၼ်ႈမၢၵ်ႇမူင်ႈၼၼ်ႉ
သမ်ႉသုင်ၼႃႇလႄႈ
ၸၢင်ႉတူဝ်ၼၼ်ႉၵေႃႈ
ဢမ်ႇၸၢင်ႈယိုၼ်းထိုင်ပိတ်းဢဝ်လႆႈ
မၼ်းၸင်ႇၸႂ်ႉႁႂ်ႈလိင်းတူဝ်ၼၼ်ႉ
ၶိုၼ်ႈပိတ်းဢဝ်လူင်းမႃးယဝ်ႉ။
သွင်ၶႃလႆႈမၢၵ်ႇမူင်ႈသေ
ၸင်ႇမႃးပၼ်တီႈၵဝ်ႉၼၼ်ႉယဝ်ႉ၊
ၸင်ႇလၢတ်ႈဝႃႈ-
“ၵမ်းၼႆႉ မၢၵ်ႇမူင်ႈ ဢၼ်ၸဝ်ႈႁႂ်ႈႁႃး
ၵႂႃႇဢဝ်မႃးၼၼ်ႉ
ႁႃးၵေႃႈၵႂႃႇဢဝ်မႃးယဝ်ႉ၊
ၵမ်းၼႆႉ တႅပ်းတတ်းပၼ်တြႃးႁႃးလႄႈ”ၼႆလႄႈ
ၵမ်းၼၼ်ႉ ၵဝ်ႉၸင်ႇၶိုၼ်းဝႃႈႁင်းသွင်ၶႃ
“ပၼ်ႁႃသွင်ၶိူဝ်ၵေႃႈ
သွင်ၶိူဝ်ပေႃႈၵႄႈလိတ််ႈဢဝ်
ႁင်းၵူၺ်းယဝ်ႉ၊
ၵဝ်သမ်ႉတေလႆႈတႅပ်းတတ်းပၼ်သင်ထႅင်ႈ”ၼႆႁင်းသွင်ၶႃ
ၵမ်းၼၼ်ႉ
သွင်ၶႃၵေႃႈမိုင်လူင်ၵႂႃႇၵမ်းၼိုင်ႈသေ
ၸင်ႇၶိုၼ်းထၢမ်ဝႃႈ
“ၸိူင်ႉႁိုဝ်လႃႇ ႁႃးတမ်ႉဢမ်ႇတၼ်းႁူႉ”ၼႆလႄႈ
ၵဝ်ႉၼၼ်ႉ ၸင်ႇၶိုၼ်းသပ်းလႅင်းၼႄ
သွင်ၶႃဝႃႈ-
“မိူဝ်ႈသွင်ၶိူဝ်ၵႂႃႇဢဝ်မၢၵ်ႇမူင်ႈၼၼ်ႉ
ယွၼ်ႉလႆႈၶၢမ်ႈၼမ်ႉၵႂႃႇ
လိင်းသမ်ႉဢမ်ႇၶၢမ်ႈလႆႈလႄႈ
ၸင်ႇလႆႈၶီႇလင်ၸၢင်ႉၵႂႃႇဢမ်ႇၸႂ်ႈႁိုဝ်?”
“ၸႂ်ႈယဝ်ႉၶႃႈ”
“မိူဝ်ႈၵႂႃႇထိုင်တီႈတူၼ်ႈမၢၵ်ႇမူင်ႈၼၼ်ႉ
ၸၢင်ႉဢမ်ႇၸၢင်ႈယိုၼ်းပိတ်းထိုင်လႆႈ
တီႈမၢၵ်ႇမူင်ႈလႄႈ
လိင်းၸင်ႇလႆႈၶိုၼ်ႈပိတ်းဢဝ်
ဢမ်ႇၸႂ်ႈႁိုဝ်?”
“ၸႂ်ႈယဝ်ႉၶႃႈ”
“ဢိူဝ်ႈၼၼ်ႉၼႃႇ
ဢမ်ႇဝႃႈသတ်းတဝႃႇမဵဝ်းလႂ်
ၽႂ်ၵေႃႈမီးၼမ်ႉၵတ်ႉ
တီႈၽႂ်တီႈမၼ်းယူႇ၊
ၽႂ်ၵေႃႈဢမ်ႇလႆႈၶႅၼ်ႇသေၽႂ်
ၽႂ်ၵေႃႈဢမ်ႇလႆႈၺၢမ်ႉသေၽႂ်
ၸႂ်ႉငိူၵ်ႈလူင်မိၼ်ၼိူဝ်ၵၢင်ႁၢဝ်ၵေႃႈ
ဢမ်ႇလႆႈ၊
ၸႂ်ႉႁုင်ႉလူင်လုၺ်းၼမ်ႉၵေႃႈ
ဢမ်ႇလႆႈ၊
တီႈၽႂ်တီႈမၼ်းၼၼ်ႉ
မၼ်းၵေႃႈၶႅၼ်ႇယူႇႁင်းၽႂ်မၼ်းလႄႈ
သွင်ၶိူဝ်တေၵႂႃႇဢဝ်
တီႈၼိုင်ႈတင်းတီႈၼိုင်ႈ
လွင်ႈၼိုင်ႈတင်းလွင်ႈၼိုင်ႈ
မႃးတႅၵ်ႈၵၼ်ၼၼ်ႉ
ႁူႉတိုၼ်းမီးပၼ်ႁႃယူႇယဝ်ႉ။
ၽိူဝ်ႇသွင်ၶိူဝ်တေထဵင်ၵၼ်လွင်ႈၼႆႉ
တႃႉသွင်ၶိူဝ်ၸွႆႈထႅမ်ၵၼ်ၵႂႃႇ
ၼင်ႇသွင်ၶိူဝ်ၵႂႃႇဢဝ်မၢၵ်ႇမူင်ႈမႃးၼႆႉ
လီသေၵႃႈႁိုဝ်လႃႇ”
ၼႆႁင်းသွင်ၶႃလႄႈ
ၶႃသွင်တူဝ်ၵေႃႈ
ပွင်ႇၸႂ်လွင်ႈၵဝ်ႉသပ်းလႅင်းၼႄ
ၼၼ်ႉသေ
ၸင်ႇလၢတ်ႈၵႂၢမ်းယိၼ်းၸူမ်းၶွပ်ႈၸႂ်
တီႈၵဝ်ႉၼၼ်ႉသေ
ၶိုၼ်းပွၵ်ႈမႃးယူႇသဝ်းႁူမ်ႈၵၼ်
မူၼ်ႈꧦသိူဝ်းꧦယူႇယဝ်ႉ။
ၼပ်ႉယမ်သေ
ဢႃးတိတ်ႉ / ပိၼ်ႇတႅမ်ႈ
6/3/2025
#သိုပ်ႇပိုၼ်ၽႄ#ပိုၼ်ႉႁူႉတႆး#ၶူၼ်ႉႁႃ#ၸွႆႈထႅမ်ၵၼ်#ၽူႈလူလိၵ်ႈ#ၵူႈတီႈ#Shan234#ၽူႈႁၵ်ႉလိၵ်ႈလၢႆး#ငိၼ်းၸူမ်းၽူႈလူလိၵ်ႈၶႃႈ#ထိင်းသိမ်းလိၵ်ႈလၢႆး#ႁဵၼ်းႁူႉလိၵ်ႈလၢႆးတႆး#တႆး#ပပ်ႉတႆး#ဢပုမ်ႇ#ၵဝ်ႉ
မိူဝ်ႈယၢမ်းၼင်ႇၼၼ်ၼၼ်ႉ
မီးမႃတူဝ်ၼိုင်ႈလႄႈၵႆႇတူဝ်ၼိုင်ႈ
သွင်ၶႃပဵၼ်ဢူၺ်းၵေႃႉလီၵၼ်သေ
ယူႇဝႆႉ ႁိမ်းပၢင်ႇတူင်ႈၼႃးတီႈၼိုင်ႈ။
ထိုင်ၼင်ႇဝၼ်းၼိုင်ႈၼၼ်ႉ
သွင်ၶႃဢွၵ်ႇၸႂ်ၶႂ်ႈလႄႇၶႂ်ႈလၢဝ်းလႄႈ
ၸင်ႇၸူဝ်းၵၼ်ဢွၵ်ႇၽၢတ်ႇယၢၼ်
တီႈႁိမ်းပၢင်ႇတူင်ႈၼႃးၼၼ်ႉသေ
ၶဝ်ႈထိူၼ်ႇၵႂႃႇ။
ၵႂႃႇၵႂႃႇ ထိုင်ၵၢင်ဝၼ်းၸမ်တူၵ်းမႃး
သွင်ၶႃၵေႃႈဢမ်ႇပွၵ်ႈၶိုၼ်းလႆႈယဝ်ႉလႄႈ
သွင်ၶႃၸင်ႇၵႂႃႇႁႃတီႈလိုဝ်ႈတီႈသဝ်း၊
လိူၵ်ႈဢမ်ႇလႄႇ သွင်ၶႃၸင်ႇၵႂႃႇႁၼ်
တူၼ်ႈမႆႉလူင်တူၼ်ႈၼိုင်ႈ။
ၵႆႇၸင်ႇဝႃႈႁင်းမႃ
“ဢႃႉ ၶမ်ႈၼႆႉတႄႉ
ႁႃးလူဝ်ႇလိုဝ်ႈတီႈၼႆႈၵူၺ်းယဝ်ႉ၊
လိူၵ်ႈဢဝ်တီႈယူႇႁင်းၽႂ်ႁင်းမၼ်းလႃႈႁေး”ၼႆသေ
ၵႆႇၵေႃႈ မိၼ်ၶိုၼ်ႈၵႂႃႇၼွၼ်း
တီႈၼိူဝ်ၵိင်ႇမႆႉပုၼ်ႉယဝ်ႉ။
မႃၵေႃႈ ၵႂႃႇႁႃတီႈၼွၼ်းမၼ်း
လိူၵ်ႈဢမ်ႇလႄႇ တီႈငဝ်ႈမႆႉ
ဢၼ်ၵႆႇၼွၼ်းၼိူဝ်မၼ်းၼၼ်ႉ
သမ်ႉမီးပိုင်ႈၵူင်ဝႆႉလႄႈ
မၼ်းၵေႃႈ ၸင်ႇဢဝ်တီႈယူႇသေ
ၼွၼ်းတီႈၼၼ်ႈယဝ်ႉ။
မိူဝ်ႈၵၢင်ၶမ်ႈၵၢင်ၶိုၼ်းတႄႉ
ဢမ်ႇပႆႇမီးပၼ်ႁႃသင်
ထိုင်ၵၢင်ၼႂ် မိူင်းၸမ်လႅင်းမႃး
ၵႆႇၼၼ်ႉ ၼင်ႇတၢင်းယၢမ်းမၼ်းမီး
မၼ်းၵေႃး ၸင်ႇလႆႈၶၼ်။
ႁဵတ်းၼၼ်သေ
တီႈဢၼ်ဢမ်ႇၸမ်ဢမ်ႇၵႆၶႃၼၼ်ႉ
ၸင်ႇမီးမႃလိၼ်တူဝ်ၼိုင်ႈ
ငိၼ်းမႅၼ်ႈသဵင်ၵႆႇၶၼ်ၼၼ်ႉလႄႈ
မၼ်းၸင်ႇဝူၼ်ႉဝႃႈ
“ႁႃႉ မိူဝ်ႈၼႆႉတႄႉ သုၼ်ႇလီယဝ်ႉႁေး
မီးၵႆႇမႃးၶၼ်ႁိမ်းဢၢႆႈႁႃးၼႆႉ၊
လႆႈၵိၼ်ၽၵ်းဝၢၼ်ယဝ်ႉၵႂႃႈ”ၼႆသေ
ၸင်ႇၵႂႃႇၸူး တီႈတူၼ်ႈမႆႉဢၼ်
ၵႆႇၶၼ်ၼၼ်ႉယဝ်ႉ။
မိူဝ်ႈၵႂႃႇႁၼ်ၵႆႇၼၼ်ႉၵေႃႈ
မၼ်းသမ်ႉယူႇသုင်ၼႃႇလႄႈ
မႃလိၼ်ၼၼ်ႉၵေႃႈ
ၸင်ႇလႆႈၶူၼ်ႉႁႃတၢင်းဝူၼ်ႉ
ဢၢၼ်းႁႂ်ႈၵႆႇတူဝ်ၼၼ်ႉ
လူင်းမႃးၸူးမၼ်းၼႆယဝ်ႉ။
ႁဵတ်းၼၼ်သေ မၼ်းၸင်ႇဝႃႈ
“ႁႃႉ ဢူၺ်းၵေႃႉ ႁဵတ်းႁိုဝ်ႁဵတ်းႁႃ
ၽႅဝ်မႃးတၢင်းၼႆႉလႃႇၼႆႉ၊
မႃးလႄႇႁဝ်းႁႃႉ?”ၼႆလႄႈ
ၵႆႇၵေႃႈ “ဢိူဝ်ႈၸႂ်ႈယဝ်ႉဝႃႈ”
ၵႆႇတူဝ်ၼၼ်ႉၵေႃႈ မိူဝ်ႈလႆႈငိၼ်း
မႃလိၼ်ၼၼ်ႉဝႃႈၼင်ႇၼၼ်ၼၼ်ႉ
မၼ်းၵေႃႈႁူႉလႆႈၵမ်းလဵဝ်ဝႃႈ
မႃလိၼ်တူဝ်ၼၼ်ႉ
တိုၼ်းတေၵျၢမ်ႇဢဝ်မၼ်းၵိၼ်ၼႆယဝ်ႉ။
မႃလိၼ်ၸင်ႇၶိုၼ်းဝႃႈ
“ပေႃးၼၼ် ႁႃးၶႂ်ႈမႃးလႄႇဢူၺ်းၵေႃႉႁဝ်းဢိူဝ်ႈ
ၵူၺ်းၵႃႈ ဢူၺ်းၵေႃႉႁဝ်းယူႇသုင်ၼႃႇလူင်
ႁႃးဢမ်ႇၸၢင်ႈၵႂႃႇလႄႇလႆႈ၊
တႃႉဢူၺ်းၵေႃႉႁဝ်း
လူင်းမႃးတီႈလိၼ်လေႃႇ ႁဝ်းတေၸၢင်ႈဢုပ်ႇၵၼ်လီꧦ”
ၵႆႇၵေႃႈၸင်ႇၶိုၼ်းဝႃႈ
“ဢႃ ၸၢင်ႈယၢပ်ႇသင်လႃႇ
တီႈငဝ်ႈတူၼ်ႈမႆႉၼႆႉ
မီးဝႆႉ ပိုင်ႈဢၼ်ၼိုင်ႈဢိူဝ်ႈ
ပေႃးၶဝ်ႈၼႂ်းပိုင်ႈဢၼ်ၼၼ်ႉၵေႃႈ
တေႁၼ်ၽၵ်းတူ
တၢင်းၶိုၼ်ႈႁိူၼ်းႁႃးၼႆႉယဝ်ႉဝႃႈ”
မႃလိၼ်ၼၼ်ႉၵေႃႈ
ၵိူဝ်ထၢင်ႇတေႉလႄႈ
ၸင်ႇၼႅတ််ႈၵႂႃႇႁႃပိုင်ႈ
ဢၼ်မီးတႂ်ႈငဝ်ႈမႆႉၼၼ်ႉ။
ၵမ်းၼၼ်ႉ မၼ်းၸင်ႇၵႂႃႇႁၼ်
မႃလူင်တူဝ်ၼိုင်ႈ
ပႂ်ႉဝႆႉယူႇလႄႈ မၼ်းၸင်ႇတူၵ်းၸႂ်သေ
ႁူႉလႆႈၵမ်းလဵဝ်ဝႃႈ
မၼ်းတေလႆႈတေႃႇသူႈၵၼ်
တင်းမႃတူဝ်ၼၼ်ႉ
ႁဵတ်းၸိူင်ႉႁိုဝ်ၵေႃႈ
မၼ်းတိုၼ်းတေဢမ်ႇပေႉလႆႈလႄႈ
“ႁႃႉ ၼႆႉတႄႉ ဢမ်ႇပဵၼ်လၢႆးယဝ်ႉ
လူဝ်ႇသွင်ႉပၢႆႈဝႆးဝႆးယဝ်ႉႁေး”ၼႆသေ
ၼႅတ်ႈသွင်ႉပၢႆႈပႅတ််ႈၵမ်းလဵဝ်ယဝ်ႉ။
#တွၼ်ႈသွၼ်
တီႈၼႆႈပေႃးႁဝ်းမႃးတူၺ်း
ပိူင်ပဵၼ်သတ်းသၢမ်တူဝ်ၼႆႉၼႆ
ႁဝ်းလႆႈတွၼ်ႈသွၼ်ဝႃႈ
(1) လူဝ်ႇမေႃဢဝ်တီႈယူႇ
လွင်ႈသင်သေမဝ်ႇဝႃႈ
ႁဝ်းလူဝ်ႇမေႃတူၺ်းဝႃႈ
ဢွင်ႈတီႈလႄႈ ၼႃႈၵၢၼ်ႁဝ်း
ၸွင်ႇမၼ်းတေငၢမ်ႇမႅၼ်ႈၵၼ်
ႁဝ်းလူဝ်ႇမေႃတမ်းပိူင်ဝၢင်းပိူင်
ႁႂ်ႈမၢၼ်ႇမႅၼ်ႈလီ”ၵွၼ်ႇ
ၼႃႈၵၢၼ်ႁဝ်းၼၼ်ႉ
ၸင်ႇၸၢင်ႈႁဵတ်းလႆႈငၢႆႈꧦလူမ်ႈꧦ။
(2) လူဝ်ႇလႆႈမေႃတူၺ်း ၵႃႇလ တေႇသ
လူဝ်ႇမေႃတူၺ်းၶၢဝ်းယၢမ်းလႂ်ၶၢဝ်းယၢမ်းၼၼ်ႉ
လူဝ်ႇမေႃတူၺ်း ဢွင်ႈတီႈလႂ်ဢွင်ႈတီႈၼၼ်ႉ
ၼႃႈၵၢၼ်ၵူႈလွင်ႈ ၶၢဝ်းယၢမ်းၵူႈမိူဝ်ႈ
ဢွင်ႈတီႈၵူႈဢၼ်ၼၼ်ႉ
ႁဝ်းတေမႃးဢဝ်တႅၵ်ႈၵၼ်ၵူႈတီႈၼႆႉ
မၼ်းဢမ်ႇလႆႈ။
တေလႆႈမေႃတူၺ်းမေႃတႅၵ်ႈၵၼ်
ထုၵ်ႇလီပိၼ်ႇပၢႆႈလႅၵ်ႈလၢႆႈ
ၸိူင်ႉႁိုဝ်ၼႆၵေႃႈ တေလႆႈလႅၵ်ႈလၢႆႈယဝ်ႉ။
(3) လွင်ႈလၢတ်ႈလွင်ႈၸႃ
ၵၢၼ်လၢတ်ႈၵၢၼ်ၸႃၼႆႉၵေႃႈ
လမ်ႇလွင်ႈတႃႇၼႂ်းၸူဝ်ႈပၢၼ်ၵူၼ်းႁဝ်းၵူႈၵေႃႉ၊
ၵေႃႉမေႃလၢတ်ႈမေႃၸႃၼၼ်ႉ
လႆႈယူႇသႃႇသေ၊
ၵေႃႉဢမ်ႇမေႃလၢတ်ႈမေႃၸႃၼၼ်ႉ
တေလႆႈၶၢမ်ႇတၢင်းၼႃႈလဵၵ်ႈတႃၼွႆႉ
တေလႆႈၶၢမ်ႇတၢင်းဢွၼ်ႈဝွၼ်းပိူၼ်ႈသေ
ၵၢၼ်ႁဝ်းၸင်ႇၸၢင်ႈပဵၼ်ယဝ်ႉ။
ၼင်ႇၵႂၢမ်းတႆးမီးဝႆႉဝႃႈ
“မီးသူပ်းဢမ်ႇမေႃလၢတ်ႈ
လိၼ်ႉၵႂၢတ်ႇပၢတ်ႈထိူဝ်ၶေႃး”
ၼႆၼၼ်ႉလႄႈ
ဢမ်ႇသၢင်ႇထုၵ်ႇ
ႁဝ်းၸၢင်ႈလႆႈတုၵ်ႉၸွမ်း
လွင်ႈႁဝ်းဢမ်ႇမေႃလၢတ်ႈၸႃၼၼ်ႉၵွၼ်ႇ။
ပိူင်လူင်သုတ်း
လူဝ်ႇႁႂ်ႈလွင်ႈတၢင်းသၢမ်လွင်ႈၼႆႉ
ၶဝ်ႈၵၼ်လီၵွၼ်ႇ
ၼႃႈၵၢၼ်ႁဝ်းၵေႃႈ ၸင်ႇတေၸၢင်ႈၶႅမ်ႉလႅပ်ႈ
ၸင်ႇတေၸၢင်ႈငၢႆႈလူမ်ၸႂ်မႃးယဝ်ႉ။
ၼပ်ႉယမ်တင်းသဵင်ႈသေ
ဢႃးတိတ်ႉ(ပိၼ်ႇတႅမ်ႈ)
25.8.2024
