ၵပျႃႇသီႇတူဝ်
ပီႈၼွင်ႉတႆးႁဝ်း − သဝ်းၼႂ်းမိူင်းလွႆ − လီၶွႆၸူဝ်ႈၵွၼ်ႇ − ပူႇမွၼ်ႇၼၢႆးၶိင်း−
ၵေႃႉၸၢႆးပဵၼ်ၶုၼ် − မီးမုၼ်ၵၢမ်ႇယႂ်ႇ −မႂ်ႇသုင်တႄႉတႄႉ− ပႄႉပိူၼ်ႈလၢႆမိူင်း− ၵိူင်းႁူဝ်ၸူးတႆး−
ၽႆးလႅင်းၼိူဝ်ႁေႃ− မေႃပွင်ၽွင်းငမ်း−ႁေႃၶမ်းၸီးဝၼ်း− ၽၼ်းၶုၼ်လႆႈလူး− ထူးမႃးၸဵမ်ႁိုင်−
ၶိုင်ပႆၶိုင်မႃး− ႁဝ်းႁႃးၽိတ်းၵၼ် −ႁိမ်ၵၼ်ၵိၼ်မိူင်း− ဢမ်ႇၵိူင်းၸူးၽႂ်− ဢဝ်ၸႂ်ပွင်လဵဝ်− ၶွင်ၵဝ်ၶွင်မႂ်း−
ၵႂၢမ်းယႂ်းသူပ်းၼမ်− ၸႂ်လမ်ၽိတ်းမေႃး− တေႃးသႃးပဵၼ်သိုၵ်း တိုၵ်းၵၼ်ၽၼ်းတႅင်း− မႅင်းမူၼ်းမႃးၸိမ်−
ႁိမ်ႁွမ်ၽိုတ်ႉသဝ်း− ၵဝ်းၵိဝ်းႁဵတ်းၶုၼ်−မုၼ်တႆးယွမ်းလူင်း −ငဝ်သူင်းပဵၼ်ၶႃႈ− ၵူမ်ႈၼႃႈႁဵတ်းၵၢၼ်−
ၵွတ်းၽၢၼ်ငိူဝ်ႈၼႃႇ− သႂ်ႇၵႂႃႇသႂ်ႇမႃး− ၵလႃးသမ်ႉၶဝ်ႈ− ပဵၼ်ၸဝ်ႈႁဵတ်းၸွမ်−
လွမ်လူထိင်းယိပ်း− ႁူၵ်းသိပ်းသီႇပီ− လီလီငၢမ်းငၢမ်း− မိူင်းႁၢမ်းၽဝ်တိုၵ်း− ပဵၼ်သိုၵ်းၵမ်ႇၽႃႇ−
ၵျႃႇပၢၼ်ႇသမ်ႉထႃႉ− ယႃႉဝၢၼ်ႈႁိမ်မိူင်း− လႆႈၵိူင်းႁူဝ်ပၼ်− ၸၼ်ယွႆးပေႃးၼႃႇ−ႁဵတ်းၶႃႈႁၢပ်ႇၽၵ်း−
ယေႈၼၵ်းယေႈထႅင်ႈ− သၢမ်ႁႅင်းသၢမ်ၽူၼ်− မိူင်းဢူၼ်ၼႅၼ်ႇၼႃႇ− ၵျႃႇပၢၼ်ႇသမ်ႉပၢႆႈ − ဢၢႆႈၶႄႇၶဝ်ႈမႃး− ၵလႃးဢမေႇရိၵၢၼ်ႇ − မေႃၺၢၼ်ႇတၢင်းၵတ်ႉ−ၵွင်ႈဝတ်ႉမျွၵ်ႈတူပ်ႇ− ၼွၼ်းမူပ်ႇယိုဝ်းသႂ်ႇ− သဵင်ယႂ်ႇၵွင်ႈႁူၺ်ႈ− ဢိၵ်ႇလူၺ်ႈမေႃႇထႃႇ− ၵႃႇပႅၵ်လမၢၵ်ႇၽႆး− လေႃႈဝႆးႁိူဝ်းမိၼ်− ၼင်လိၼ်ပေႃးသၼ်ႇ− ႁွၼ်ႈပၼ်ႇပွႆႇမၢၵ်ႇ− ပိၼ်ႈထၢၵ်ႇယိုဝ်းၼၢၵ်ႈ− ၵွင်ႈၸၢၵ်ႈမၢၵ်ႇပုင်း − ၼၼ်းဢုင်းဢူၼ်ဢိုၵ်း − ပၢင်သိုၵ်းမိူင်းတႆး− ၵႂၼ်းၽႇးပေႃးတဵမ် − ၸဵမ်ၸဝ်ႈဢိၵ်ႇၶႃႈ− ၵူမ်ႈၼႃႈတဵတ်ႇယွမ်ႇ− ထွမ်ႇသၢႆႉထွမ်ႇၶႂႃ − လွမ်ႁႃတၢင်းပၢႆႈ− ဢၢႆႈလႂ်ၵူၼ်းႁၢႆႉ− ယေႈၶႅၼ်းပၢႆႈၵႆ− ပဵၼ်ၼႆပူၼ်ႉၵႂႃႇ − မိူင်းသႃႇၶိုၼ်းလီ− သိပ်းပီတဵမ်မႃး− ႁဝ်းႁႃးၸဝ်ႈၶႃႈ− ၵဝ်ဝႃႈဢၼ်လမ်
− မႂ်းဝႃႈဢၼ်လႅင်− သူပ်းၶႅင်ၵႂၢမ်းၸၢၼ်း− ၽႂ်မၼ်းဢမ်ႇၽွမ်ႉ− ပိူၼ်ႈယွမ်ႉသၢႆႁေႇ− ပရိယေႇပိူၼ်ႈၶဝ်ႈ− ၸဝ်ႈဢမ်ႇထုၵ်ႇၶႃႈ−
ၶႃႈဢမ်ႇၽွမ်ႉၶုၼ်− ၸဝ်ႈမုၼ်ပေႃးမဝ်း− ႁဝ်းႁႃးၶတ်းၵၼ်− ပဵၼ်ၼၼ်သေယဝ်ႉ−ၵမ်ႈၽွင်ႈႁဝ်ႉၼႃႇ− ပၢႆႈၵႂႃႇမူၵ်းယုမ်း−
ႁဵတ်းၸုမ်းပဵၼ်မုၵ်ႉ − ၶၢမ်ႇတုၵ်ႉၶၢမ်ႇယၢပ်ႇ
−ပႃးလၢပ်ႇယိပ်းၵွင်ႈ− ၶိုင်လွင်ႈတၢင်းႁၢႆႉ− ၶၢႆႉၽၢတ်ႇႁိူၼ်းယေး− ယၢၼ်မေးပၢႆႈလုၵ်ႈ − တုၵ်ႉၶၸွမ်းၵၼ်− ဢၢၼ်းႁၼ်မိူဝ်ႈၼႃႈ −
ၵိူဝ်းဝႃႈတၵ်းလီ− ပီၼႆႉသၵ်ႈၵရဵတ်ႈ− ႁဵင်သၢမ်ပၢၵ်ႇသၢဝ်းသွင်− မိူင်းမွင်ယူႇယၢပ်ႇ− တႂ်ႈလၢပ်ႇတႂ်ႈၵွင်ႈ− ၵမ်ႈၽွင်ႈၶိုင်ၸူၼ်− ၽူႈဢုၼ်ၵူၼ်းၵဝ်း− ၸိူဝ်းႁဝ်းၽၵ်းၵႃႇ −ၼႃႇၸႂ်ၶိုၵ်ႉတေႉ ပႄးမႃးမွင်းမၢင်ႇ−ၾႃႉပၢင်ႇမိူင်းလီ− ယၢၼ်ၶီပူၼ်ႉမႆႈ− လႆႈၵႂႃႇမႃးငၢႆႈ −
ဢၢႆႈပီႈလုင်းဢၢဝ်− မၢဝ်ႇသၢဝ်လဵၵ်ႉႁၢႆး− ၸၢႆးယိင်းၶဝ်ဢိူၺ်။
တႅမ်ႈ − လုင်းတၢင်းၵႄး
ႁွမ်တႅမ်ႈ − ထႅၼ်ႈလမ် − သိုပ်ႇပိုၼ်ၽႄ တီႈ ဝႅပ်ႉ ၊ ၽဵတ်ႉ ပိုၼ်ႉႁူႉတႆး Bunhudai
