ၼႃႈၵၢပ်ႇ ….
ၵူႈဝၼ်းဝၼ်းၼႆႉ ႁဝ်းလႆႈသုပ်းဝႆႉၼႃႈၵၢပ်ႇ
မၢင်ပွၵ်ႈ သုပ်းဝႆႉတႃႇ ၵႅတ်ႇၶႄတူဝ်ၵဝ်ႇႁဝ်း
မၢင်ပွၵ်ႈ သုပ်းဝႆႉတႃႇ ႁူမ်ႇတူမ်းပႅတ်ႈ
တၢင်းတုၵ်ႉၶီမွင်ႁဝ်း …
ယဝ်ႉၵေႃႈ မၢင်ပွၵ်ႈ သုပ်းဝႆႉတႃႇ
ၼႄလွင်ႈဢၼ်ႁဝ်း တူၺ်းႁၼ်မိူင်းၶူင်းၵၢင်
ၸိူင်ႉၼင်ႇႁိုဝ် …။
ၽႆၢႇလင် လွင်ႈယုမ်ႉဝၢၼ်ၼၼ်ႉ
တိုၼ်းမီး လွင်ႈယွၵ်ႇလႅၼ်ၽၢမ်းတႃ
မူၵ်းသိူင်ႇဝႆႉ လိူတ်ႇႁွၼ်ႉၼင်ႇ မုၵ်ႉၾႆးၵေႃႈ
ႁူႉတေပဵၼ် …
ၽႆၢႇလင် လွင်ႈၵႅၼ်ႇၶႅင်ၼၼ်ႉ
ႁူႉတိုၼ်းမီး လွင်ႈလပ်ႉႁူလပ်ႉတႃသေ
ယွတ်ႇꩡိုမ်းၼမ်ႉတႃၵေႃႈ မၼ်းတေမီး …။
ၽႆၢႇလင် လွင်ႈဢူတ်းယိူၼ်ႉၵၼ်ႈၼၼ်ႉ
ႁူႉတိုၼ်းမီး သဵင်ၶဵင်ႇတႃႉ ဢၼ်လင်ယွၼ်ႈ
မိူၼ်သဵင်ၾႃႉၽႃႇ လႄႈ လူမ်းလႅင်ႉလူင်ၵေႃႈ
ꩡၢင်ႈပဵၼ်လႆႈ …။
ဢၼ်ႁဝ်း သုပ်းၼႃႈၵၢပ်ႇဝႆႉၼႆႉ
ဢမ်ႇꩡႂ်ႈၼႄဝႃႈ ႁဝ်းပဵၼ်ၵူၼ်းတူၵ်းသုမ်း
ဢမ်ႇႁတ်းၼႄၼႃႈၼႄတႃ …
ၵူၺ်းၵႃႈ ႁဝ်းသုပ်းဝႆႉတႃႇ ၶဵင်ႇတႃႉ
မိူင်းၶူင်းၵၢင် ဢၼ်ဢမ်ႇႁၼ် လွင်ႈယုမ်ႇယမ်
တီႈတူဝ်ၵဝ်ႇႁဝ်း ဢၼ်ပႂ်ႉသီႇၵေႉႁေႈတႃ
ႁဝ်းၼၼ်ႉၵူၺ်း။
ꩡႂ်ႈယဝ်ႉ …
ဝိၺၢၼ်ႇ ၾၼ်ငဝ်းႁဝ်း
ပဵၼ်တီႈ မီးလွင်ႈလွတ်ႈလႅဝ်းလီတဵမ်ထူၼ်ႈ
ဢၼ်ဢမ်ႇလူဝ်ႇလႆႈမီး ၼႃႈၵၢပ်ႇ
သုပ်းသိူင်ႇဝႆႉ ႁဵတ်းပဵၼ်လွင်ႈၽၢမ်းတႃ ..
မၢၵ်ႇႁူဝ်ꩡႂ်ဢၼ်မီးလွင်ႈ ꩡိုၼ်ႈꩡၢင်ႇ
လွင်ႈယုမ်ႇယမ် ဢၼ်ႁဵတ်းပဵၼ်
လူမ်းထူၺ်ႈꩡႂ် ပွၵ်ႈလိုၼ်းသုတ်း
ဢၼ်ဢမ်ႇတွၼ်ႉယၢမ်ႈယွၵ်ႇလႅၼ်ၼၼ်ႉ
တိုၼ်းတေမီးယူႇၵႂႃႈ …။
(ပိၼ်ႇတႆး)
သႅၼ်ပိုၼ် (သီႇၵႄႇ)
18..11..2025
သင်ဝႃႈ ….
မိုဝ်းသူၽႆၢႇၼိုင်ႈၼၼ်ႉ ယိပ်းဝႆႉၵွင်ႈꩡိုင်
ႁႂ်ႈယိပ်းဝႆႉ ပပ်ႉလိၵ်ႈပၼ်တၢင်းႁူႉတႃႉ …။
* သင်ဝႃႈ မေႃယိပ်းၵွင်ႈၵူၺ်းသေ ..
ဢမ်ႇမေႃ ယိပ်းပပ်ႉꩡိုင်
ၵွင်ႈဢၼ်သူယိပ်းၼၼ်ႉ မၼ်းပဵၼ်ၶူဝ်းၶွင်
ၽူႈလၵ်ႉၵူၼ်းꩡူၼ်ယဝ်ႈ။
* ယွၼ်ႉဝႃႈ .. ပပ်ႉလိၵ်ႈ လႄႈ ၵွင်ႈၼႆႉ
ပဵၼ်ၶိူင်ႈယိပ်း ဢၼ်တေၵႅတ်ႇၶႄပၼ်
ၽႅၼ်ႇလိၼ် ၊ ꩡိူဝ်ႉၸၢတ်ႈ၊ဝၢၼ်ႈၵိူတ်ႇ
မိူင်းၼွၼ်းႁဝ်းၼၼ်ႉယဝ်ႉ။
ၼပ်ႉယမ်ယႂ်ႇၼမ်သေ –
သႅၼ်ပိုၼ် (သီႇၵႄႇ)
15..11..2025
ဝွၵ်း ꩡူဝ်ႈပၢၼ် (309)
တႃပွၵ်ႈထိုင် လွတ်ႈလႅဝ်း
ၽႂ်ပႆႇပူၼ်ႉဢွၵ်ႇ ပၢၼ်လိူတ်ႈၶႅဝ်း။
* တိုၵ်ႉမိုင်ၵႂင် …
တေဢၢၼ်းသင် ပႆႇႁူႉ
လိူတ်ႈလႅင်ၼွင်းၵမ်ႇ ယွတ်ႇလႆလူႉ။
* ပႆႇၸၢင်ႈမိူဝ်း …
ၽႃၽိူဝ်း ၵႂႃႇၸွမ်းၵၼ်
လွတ်ႈလႅဝ်းၼႆၼၼ်ႉ တိုၵ်ႉပဵၼ်ၾၼ်။
* တုၵ်ႉလႆၢပၢၼ် …
ၽၢၼ်ယဝ်ႉ ၽၢၼ်ဢမ်ႇဝႆၢး
မူၼ်ႇမူဝ်းမိုတ်းမွင် ႁၼ်လႆၢးလႆၢး။
* မၼ်းမိုတ်းမူတ်း …
ႁဝ်းႁူတ်း ႁိုဝ်ႁတ်းႁၢၼ်
ၵွပ်ႈၵုမ်ႇၵဝ်းၵၼ် ၵွႆၵွပ်ႈၵၢၼ်။
သႅၼ်ပိုၼ် (သီႇၵႄႇ)
10..11..2025
မိူင်းၼႆႉပဵၼ် မိူင်းသင်?
ၼမ်ႉမီးၵိၼ် ..
ၵူႇမီးၼွၼ်း ..
ယွၼ်ႉသင် လႆႈယွၼ်းပိုင်ႈ မိူင်းပိူၼ်ႈ …?
မိူင်းၼႆႉပဵၼ် မိူင်းၽႂ် ?
မီးဝတ်ႉဝႃး ..
ၽြႃးတဵမ်ၵိူင်း ..
မိူင်းၸဝ်ႈမုၼ် ..
ၶုၼ်တဵမ်ဝၢၼ်ႈ ..
ယွၼ်ႉသင် လႆႈသၢၼ်ႈမူၵ်း ပႆၢႈတဵတ်ႇ ..?
မိူင်းၼႆႉပဵၼ် တႃႇၽႂ်?
ဝၢၼ်ႈတႂ်ႈမိူဝ် ..
ဝၢၼ်ႈၼိူဝ်သၢၼ်ႈ ..
ဝၢၼ်ႈႁွင်ႇၵၢၼ်း ..
ဝၢၼ်ႈꩡၢၼ်းလႅၼ်ႈ ..
ယွၼ်ႉသင် လႆႈၸူမ်ၼႅၼ်ႈ ၽၢတ်ႇၽႄ …
ပေႃးၼၼ်လူး …
မိူင်းၼႆႉပဵၼ် မိူင်းၽႂ်
မိူင်းၼႆႉ လုၵ်ႉမႃးလႂ်
ႁူဝ်ꩡႂ်တႆး ၵူႈၵေႃႉ
လီသေႃႉႁဵၼ်းႁူႉယဝ်ႈ ….