————
ၸႂ်ဢွၼ်ႇၶႂ်ႈယိုၼ်ႈယွၼ်း
လၢတ်ႈဢိၼ်းဢွၼ်းၶၢၼ်ပၢၵ်ႇ
ၶဵၼ်ႇလိၵ်ႈဝၢၵ်ႇပဵၼ်ဝွၵ်း
ၵၢဝ်ႇလိူၼ်လၢဝ်ႁႂ်ႈ လၢတ်ႈထိုင်မၼ်း/
လၢတ်ႈလွင်ႈတၢင်းၸႂ်ထိုင်
ယၢၼ်ႁိုင်ၵေႃႈဢမ်ႇလိုမ်း
တိုၵ်ႉၵိုမ်းမၼ်ႈမိူၼ်ၵဝ်ႇ
ၵူႈၽဝ်ႇမိူဝ်ႈဝူၼ်ႉၶွပ်ႈ
ၸႂ်ဢွၼ်ႇပေႃးငဝ် ၸွပ်ႈပဵၼ်ၵမ်း/
ၵူၼ်းမိူင်းၵႆဢွၼ်ႇႁဝ်း
ၽၢင်ငဝ်းတိုၵ်ႉၵိုတ်းထင်
ဝၼ်းလင်ဢွင်ႈယၢမ်ႈၶိၼ်း
လၢတ်ႈဢိၼ်းဢွၼ်းဢုပ်ႇမူၼ်ႈ
တႂ်ႈတူၼ်ႈႁၵ်ႉဢၼ် ႁႃးႁူမ်ႈၽုၵ်ႇ/
ၶေႃႈမၼ်ႈၵႅၼ်ႇၵူႈၶေႃႈ
တွင်းယူႇဢေႃႈၵူႈၵမ်း
ဝူၼ်ႉၸွမ်းတႃယမ်းယွတ်ႇ
ၸႂ်ႁၵ်ႉၶွတ်ႇတၢၼ်ႇလႂ်
ၽႂ်ဢမ်ႇလိူဝ်လႆႈ ၵၢမ်ႇၵျမ်ႇမႃႇ/
ၸႂ်ဢွၼ်ႇပေႃးဢူၼ်ႈၼူၼ်း
မိူဝ်ႈႁူႉဝႃႈၵူၼ်းဢၼ်
ႁဝ်းဝႆႉၵႃႈၶၼ်ၼႃႇ
လၵ်ႉသပ်းၽႃႇတၢင်းလင်
ဢမ်ႇဝူၼ်ႉသင်သေ မိူဝ်းႁၵ်ႉပိူၼ်ႈ/
လိူဝ်သေဝႃႈၸႂ်ထိုင်
ၶၢဝ်းႁိုင်ဢမ်ႇယၢမ်ႈလိုမ်း
တူၵ်းၶိုမ်းႁၵ်ႉမၼ်းၵၢင်
တူဝ်ၵဝ်ႇမဝ်မၢင်ပူၼ်ႉ
ဢမ်ႇဝူၼ်ႉၶိုတ်းၸွမ်း လွၵ်းမႃႇယႃႇ/
လွမ်ၵူဝ်ၸႂ်ၸဝ်ႈၵဝ်ႇ
ၶွၼ်းၶဝ်ႇငိူဝ်ႈၵမ်းသွင်
တူၵ်းထွင်ထႅင်ႈလွၵ်းႁၵ်ႉ
မဝ်းမၵ်ႉထႅင်ႈၵႂၢမ်းဝၢၼ်
ယႃႉၶိုၼ်းၸၢတ်ႈပၢၼ် တူဝ်ၸဝ်ႈၵဝ်ႇ/
ၸႂ်ထိုင်တႄႉလိူဝ်တွၼ်း
ဢမ်ႇဢဵၼ်းဝွၼ်းႁၵ်ႉထႅင်ႈ
ႁႂ်ႈၼမ်ႉယၢတ်ႇႁႅင်ႈသေ
တေဢမ်ႇလႆႈၸဵပ်းထႅင်ႈ
ယွၼ်ႉလွင်ႈႁဵတ်းၵႅင်ႈ ၵူၼ်းမၢင်ၵေႃႉ/
မိုၵ်ႉ
မွၵ်ႇၵွၼ်ႁွမ် ထုင်ႉမၢဝ်း
26 5 2025 ဝၼ်းၸၼ်
ႁူဝ်ၸႂ်တိုဝ်
————
သူပ်းလၢတ်ႈသင်ႇ
ၸွမ်းၼင်ႇမၼ်းၶႂ်ႈပဵၼ်
ၸႂ်ဢွၼ်ႇသမ်ႉလၢတ်ႈ တူၵ်ႇပၼ်ၶဵၼ်/
ဢမ်ႇတၢၼ်ႈၶၢၼ်ၸွမ်းမၼ်း
ၵူၺ်းႁူဝ်ၸႂ်သမ်ႉ ဝၢၼ်ႇၸိူဝ်ႉၽၼ်း/
ၸႂ်တိုဝ်တၼ်
ဝူၼ်ႉႁၼ်လွင်ႈၸဵပ်းၵႅၼ်း
လွင်ႈဢၼ်မႂ်းတင်ႈ ၸႂ်မိပ်ႇၺႅၼ်း/
ၸပ်းတိတ်းႁၵ်ႉ
မဝ်းမၵ်ႉၵေႃႈပဵၼ်မႂ်း
ပႆႇလၢပ်ႇၵွၼ်ႇႁႃႉ လွင်ႈၸဵပ်းယႂ်း/
သင်ႇပွၼ်ႈၵႂၢမ်း
မိူဝ်ႈယၢမ်းမႂ်းဢူၼ်ႈဢွၼ်ႇ
ၸႂ်ၵေႃႉသင်ႇၼမ်ႉ တႃဝၢင်းယွၼ်ႇ/
ၸႂ်ႉဢွၵ်းဢေႃ
ဢၼ်မေႃဝူၼ်ႉလီႁၢႆႉ
ၸႂ်လေႃလႄမႂ်း ၵႆႉသုတ်ႉၶၢႆႉ/
ႁူဝ်ၸႂ်ငိူဝ်ႈ
ယွၼ်ႉပိူဝ်ႈမႂ်းဢူၼ်ႈဢွၼ်ႇ
ဢွၵ်းဢေႃပေႃးဢမ်ႇ တၼ်းဝူၼ်ႉသွၼ်ႇ/
ႁူဝ်ၸႂ်လိူင်း
တၢင်းမိူင်းၵူၼ်းၼမ်လၢႆ
မႂ်းၵႂႃႇလိူၵ်ႈႁၵ်ႉ ၵူၼ်းၸႂ်ၽၢႆ/
ႁူဝ်ၸႂ်လိူင်း
တၢင်းမိူင်းၵူၼ်းၼမ်ၶွၼ်ႈ
ႁၵ်ႉဢၼ်ႁၢမ်းၽူၺ်း တိုၵ်ႉၶဝ်ႈသွၼ်ႈ/
ႁူဝ်ၸႂ်လိူင်း
တၢင်းမိူင်းၵူၼ်းလိူင်ႇၼမ်
ပိူၼ်ႈဢမ်ႇႁၵ်ႉမႂ်း တိုဝ်ၶဝ်ႈၸမ်/
ႁူဝ်ၸႂ်လိူင်း
တၢင်းမိူင်းၵူၼ်းၼမ်ၼႃႇ
ယွၼ်ႉသင်ဢမ်ႇလိူၵ်ႈ ႁၵ်ႉလီလႃႇ?
ႁၢမ်းတၢင်းႁူႉ
လိူၵ်ႈၸူႉဢၼ်မီးၸဝ်ႈ
လႆႈၸဵပ်းႁွၼ်ႉလိူတ်ႇ ၸဵမ်ပိုင်းငဝ်ႈ/
#တိုဝ်တၼ်ၼိုၵ်းၼူၵ်ႇယွၼ်ႉႁၵ်ႉမၼ်း
မိုၵ်ႉမွၵ်ႇၵွၼ်ႁွမ် ထုင်ႉမၢဝ်း
27 5 2025 ဝၼ်းဢၢင်းၵၢၼ်း
———————
မၢင်ၸိူဝ်းၽၢၼ်ပေႃႈမႄႈ
ပီႈၼွင်ႉလႄႈလုၵ်ႈလၢင်း
ၸဵမ်တၢင်းႁိူၼ်းသဝ်းထင်
တေလႆႈမၵ်းမၼ်ႈ ပဵၼ်ယွၼ်ႉၽႂ်/
မၢင်ၸိူဝ်းႁႃပႆႇႁၼ်
တိုၵ်းတၼ်ၵူၼ်ႇဢိုတ်းဝႆႉ
တၢင်းၸဵပ်းၼႆႉတွၼ်းလိူဝ်
ၸၼ်ႉၼိူဝ်ဢိၵ်ႇၸၼ်ႉတႂ်ႈ
တၢႆတူႇၵႂ်ႈၶမ် လိၼ်ပဵၼ်မူႇ/
ၽိုၼ်ႉႁၼ်ၶၢဝ်ႇၵမ်းလႂ်
ၼႂ်းၸႂ်ပေႉဢိုၵ်ႉၼိုၵ်ႉ
ၼမ်ႉတႃၸိုၵ်ႉယွတ်ႇၸွမ်း
ႁၼ်ၶဝ်ႁွမ်းမိုဝ်းသႃ
ၼမ်ႉတႃဢွၼ်ႇပေႃး တဵမ်ဢွင်ႈဝႆႉ/
ႁိူၼ်းၵူၼ်ႇပင်းပဵၼ်ထႅဝ်
လုလႅဝ်ပႅတ်ႈတင်းဝဵင်း
လိၼ်ပဵင်းပေႃးပဵၼ်ၽဝ်ႇ
လုၵ်းလဝ်ႇပေႃးပဵၼ်တဝ်ႈ
ၸဵမ်သင်ႇၶႃႇၸဝ်ႈ လွၼ်ႇတင်းၼမ်/
သဵင်ႁွင်ႉႁႆႈသႅၼ်ႇပၢဝ်ႇ
ၶဝ်ၵၢဝ်ႇယွၼ်းတၢင်းၸွႆႈ
ႁၼ်ယဝ်ႉၸႂ်မွႆႈၵပ်ႉ
လိၼ်ၵူၼ်ႇလပ်ႉဢိုတ်းတၼ်
ငိၼ်းသဵင်ယူႇၵူၺ်း ဢမ်ႇႁၼ်ၵူၼ်း/
မၢင်ၸိူဝ်းၵေႃႈလုတၢႆ
ထႅင်ႈၼမ်လၢႆႁၢႆၵႂႃႇ
ယွၼ်ႉၽေးသၽႃႇဝ
တုၵ်ႉၶၵူၼ်းလၢႆသႅၼ်း
ၸႂ်ဢွၼ်ႇမူၺ်ႈၵႅၼ်း ၸွမ်းသူၶဝ်/
ယွၼ်းသူင်ႇယိုၼ်ႈမႅတ်ႉတႃႇ
လၢႆၽႃႇသႃႇၶိူဝ်းၵူၼ်း
ႁႂ်ႈသိူဝ်းလူၼ်းၶိင်းၽႂ်
ၸဵမ်ၸိူဝ်းတိုၵ်ႉမီးၸႂ်
ၸဵမ်လုသဵင်ႈလႂ်ႁႂ်ႈ ႁွတ်ႈတီႈၵတ်းယဵၼ်ၵၼ်သေၵမ်း……
#ပိၵ်ႉသမ်ႉပဵၼ်ၵူၼ်းၶိူဝ်းလႂ်သေၵေႃႈယႃႇ
#ပိၵ်ႉသမ်ႉပဵၼ်ၽႃႇသႃႇလႂ်ၵေႃႈယဝ်ႉ
ပၢႆၵမ်
မွၵ်ႇၵွၼ်ႁွမ် ထုင်ႉမၢဝ်း
3 4 2025 ဝၼ်းၽတ်း 
ၽေးၵိုင်ႉၵၢင်ႉ
——————
ၽႂ်ႁိုဝ်တၼ်းႁူႉ
ပဵၼ်လူႉဝႆးၶၼ်
ဢမ်ႇပၼ်တင်းၾၢင်ႉ
ၵိုင်းပေႃးႁွင်ႉဝႃႈ-ၽေးၵိုင်ႉၵၢင်ႉ။
ႁိူၼ်းယေးၶူဝ်းၶွင်
ၵူၼ်ႇၵွင်လူမ်ႉလၼ်ႇ
ဢိင်ႇသၼ်ႇလိၼ်ဝႆ
ၼမ်ႉလိူတ်ႈ၊ ၼမ်ႉတႃ-ၼွင်းလူၼ်ႉလႆ။
ဝဵင်းလိူဝ်ႇၸေႈၵႅင်း
ပဵၼ်ႁႅင်းသုတ်းၼမ်
တိူဝ်ႉယမ်ၶိုဝ်းမႅၼ်ႈ
တေႇတႅၵ်ႇငဝ်ႈပိုၼ်ႉ-ၺႃးသၢႆလႅၼ်ႈ။
မိူင်းတႆးမၢင်တွၼ်ႈ
တုမ်ႉယွၼ်ႈလၢႆပႃႈ
ႁၢႆးယႃႈ၊ ဢွင်ႇပၢၼ်း
လူမ်ႉၸူမ်လူႉၶွႆႈ-ၽႅဝ်ၵိင်းၶၢၼ်း။
ၸိူဝ်းတၢႆႁၢႆသုမ်း
တုမ်လုမ်းႁဵင်လူၼ်ႉ
တႃႇၶူၼ်ႉႁႃသွၵ်ႈ
ၸႂ်ယႂ်ႇၶဝ်ၸိူဝ်း-ယူႇမိူင်းၼွၵ်ႈ။
တႅမ်ႈ-ၸၢႆးသိူဝ်ႁၢၼ် ၼမ်ႉလၼ်ႈ၊ဝၢၼ်ႈလီႈ
3.4.2025