ထိုင်-ၵေႃႉမေႃယုမ်ႉ
ႁူႉဢမ်ႇၸၢင်ႈယိုၼ်း
တိုၵ်ႉၶိုၼ်းၶႂ်ႈယိုၼ်ႈ
ၶၢဝ်ၸိုၼ်ႈငၢမ်းပွတ်ႇ
ၵႅမ်ႈၶွင်ႇမေႃယုမ်ႉ သီမၢၵ်ႇလွတ်ႇ။
ၵႅၼ်ႇပေႉငၢမ်းတွၼ်း
ၵႅၼ်ႇမွၼ်းၼုမ်ႇထူၼ်ႈ
လမ်းတူၼ်ႈႁၢင်ႈလီ
သၽႃႇဝလဝ်း လွတ်ႈယွမ်ႉသီ။
ၵူႇသွႆႈၵီႈပူင်း
ၽိုင်ႈလူင်းႁႃတွမ်
သႅဝ်ႁွမ်ႁူၺ်းႁိုၼ်း
ၸွင်ႇတေသိုပ်ႇၵီႈ ႁႂ်ႈယၢဝ်းယိုၼ်း။
ၵႅၼ်ႇၵူဝ်ပိူၼ်ႈလၵ်ႉ
မႃးၽၵ်ႉတူၼ်ႈလမ်း
ႁူႇႁမ်းႁႅင်ႈႁဵဝ်ႇ
သင်ပွင်ႇၸႂ်လႆႈ ယွၼ်းၵွင်ႉၵဵဝ်ႇ။
ဢမ်ႇမိူဝ်ႇၸၢင်ၸၢၼ်ႈ
ဢမ်ႇယၢၼ်ႈတႃႇၶေ
ပိူင်းၼေၸႂ်ႁၵ်ႉ
ယႃႇယူႇယၢၼ်ၵႆ ယုမ်ႉယွၵ်ႇယၵ်ႉ။
တႅမ်ႈ-ၸၢႆးသိူဝ်ႁၢၼ် ၼမ်ႉလၼ်ႈ ဝၢၼ်ႈလီႈ
17.10.2024
ၸႂ်မႃႇၼ
ၸႂ်မႃႇၼ
ၵူၼ်းႁဝ်းၼႆႉ
ပေႃးမီးၸႂ်မႃႇၼ
ထၢင်ႇဝႃႈၵျႃႉသေပိူၼ်ႈ
ၼေငိူၼ်ႈပူၵ်းမၢၼ်ႇထွင်ႇ
မေႃယွင်ႇၵႂၢမ်းယွင်ႈၶိုၼ်ႈ
ထၢင်ႇတိုၼ်ႈပိူၼ်ႈၵူၼ်းလၢႆ
ၶႃႉၶၢႆပိူၼ်ႈ ၶုၺ်ႈၼႅၼ်ႇ
ၸဝ်ႈၵဝ်ႇၶႅၼ်ႇသုတ်းၵေး
သေႉၼေးပိူၼ်ႈၵႅၼ်ႇမေႃ
ထေႃၽုင်းၸဝ်ႈၵဝ်ႇႁိူဝ်ႈ
ၵူၼ်းငိူဝ်ႈဢမ်ႇမီးၺၢၼ်ႇ
ၵိုင်ႇတၢၼ်ႇၸႂ်မႃႇၼ
ၵူၼ်ႇယႃႉၸၢတ်ႈပၢၼ်မၼ်း
လၢတ်ႈၵႂၢမ်းဢမ်ႇႁူႉတူဝ်
ၶူဝ်ယူႇဢမ်ႇႁူႉႁၢင်ႈ
ယၢင်ႈယူႇဢမ်ႇတူၺ်းတိၼ်
ၶိၼ်ၸႂ်မိူဝ်ႈၶီႇလိုတ်း
ၵွပ်ႈၼႆထုၵ်ႇလီဝူၼ်ႉ
ဢဝ်ၺၢၼ်ႇၶူၼ်ႉၸိုၼ်ႈသႂ်
ၽႂ်ၽႂ်ၵေႃႈပဵၼ်ၵူၼ်း
ႁူဝ်မူၼ်းဢွၵ်းၵေႃႉလုၵ်ႈ
ႁဝ်းၶိုၵ်ႉၵေႃႈယႃႇထွင်ႇ
ႁဝ်းဢွင်ႇၵေႃႈယႃႇမႅၼ်
ဝႆႉၽဵင်ႇၶိုင်ႈၵၼ်ၵူၼ်း
ယူႇသိူဝ်းလူၼ်းႁူမ်ႈလူၺ်ႈလီယဝ်ႉ။
တႅမ်ႈ-ၸၢႆးသိူဝ်ႁၢၼ် ၼမ်ႉလၼ်ႈ၊ဝၢၼ်ႈလီႈ
16.9.2024
ၵၢမ်ႇၵျၢမ်ႇမႃႇတႆး
ၵိင်းၾႆးပႆႇပူၼ်ႉ
ၼမ်ႉငူၼ်ႉတိုၵ်ႉၼမ်
တႃႇလွင်ႈၽွမ်ႉႁူမ်ႈ ၵိုတ်းၶွင်ႉၶမ်။
ၶတ်းၸႂ်သုတ်ႉၸမ်
ၼပ်ႉယမ်တေႃႇၼႃႈ
သွင်ပႃႈဢုပ်ႇတၵ်ႉ
ဢမ်ႇယိုၼ်းယၢဝ်းႁိုင် ၶၢတ်ႇလွင်ႈႁၵ်ႉ။
ၼမ်ႉတႃၵူၼ်းမိူင်း
ယိုင်ႈဢိူင်းလူၼ်ႉလႆ
ပဵၼ်ၼႆဢမ်ႇဝၢႆး
ၵၢမ်ႇၵျၢမ်ႇမႃႇတႆး လႆႈတၢႆၽၢႆး။
ဢီးလူၵေႃႉတၢႆ
သေလၢႆၸႂ်ၶိူဝ်း
ပုၼ်ႈမိူဝ်းၼႃႈၼႆႉ
ၵၢမ်ႇၵျၢမ်ႇမႃႇတႆး တေသိုပ်ႇပဵၼ်ႁိုဝ်ဝႆႉ။
ငိၼ်းမွင်ၸႂ်ၼႃႇ
ရႃႇၸႃႇၶိူဝ်းၶုၼ်
ဢူမုၼ်ၽုင်းယွမ်း
ပဵၼ်ယွၼ်ႉႁဝ်းပႆႇ ၸၢင်ႈႁူမ်ႈႁွမ်း။
တႅမ်ႈ-ၸၢႆးသိူဝ်ႁၢၼ် ၼမ်ႉလၼ်ႈ ဝၢၼ်ႈလီႈ
25.11.2024
